2027 жылғы 1 қаңтардан бастап жұмыс берушінің міндетті зейнетақы жарналарының (ЖБМЗЖ) мөлшерлемесі 3,5%-дан 4,5%-ға дейін көтеріледі. 2028 жылы оны 5%-ға дейін жеткізу жоспарланып отыр.
ЖБМЗЖ жұмыс берушінің өз қаражаты есебінен төленеді, қызметкердің жалақысынан ұсталып қалмайды. Жарналар қызметкерлердің Бірыңғай жинақтаушы зейнетақы қорындағы (БЖЗҚ) шартты зейнетақы шоттарына түседі.
ЖБМЗЖ төлеуге арналған жұмыс берушінің шығыстарын салық салынатын табыстан шегерімге жатқызуға болады. Еңбек министрлігінің мәліметінше, бұл жұмыс берушілер үшін жүктемені қолайлы деңгейде ұстап тұруға мүмкіндік береді.
ЖБМЗЖ қызметкердің болашақ зейнетақысының қосымша бөлігін қалыптастырады. Осылайша, зейнетақы төлемдері үш бөліктен тұрады:
- Мемлекеттен берілетін базалық зейнетақы.
- Қызметкердің БЖЗҚ-ға өз жарналары есебінен қалыптасатын жинақтаушы зейнетақы.
- Жұмыс берушінің жарналары есебінен қалыптасатын шартты жинақтаушы зейнетақы.
ЖБМЗЖ төлеу міндеті 1975 жылғы 1 қаңтардан кейін туған қызметкерлерге ғана қолданылады.
