Цифрлық теңге құқықтық негізге ие болады
Заң жобасы цифрлық теңгенің құқықтық мәртебесін бекітеді және цифрлық қаржы активтері (ЦҚА) саласында толыққанды реттеу енгізеді. Бұл цифрлық есеп айырысулар мен қаржылық инновациялар үшін ашық әрі қауіпсіз инфрақұрылым қалыптастыруға жасалған қадам.
Цифрлық қаржы активтерінің үш санаты
Құжат ЦҚА-ны үш негізгі түрге бөлуді көздейді:
- ақшалай талап ету құқықтарын куәландыратын цифрлық активтер;
- базалық активтермен қамтылған цифрлық қаржы активтері;
- цифрлық нысанда шығарылатын қаржы құралдары.
Мұндай тәсіл әртүрлі цифрлық құралдарға қатысты құқықтық режимді айқын шектеп, нарық қатысушыларының сенімін арттырады.
Финтех пен инновацияларды қолдау
ЦҚА-ны реттеуден бөлек, заң жобасы финтех-секторын дамытуға серпін береді. Банктерге озық технологиялармен — жасанды интеллект, биометрия, киберқауіпсіздік, электрондық коммерция және телекоммуникациялар — жұмыс істейтін компанияларға инвестиция салуға рұқсат етіледі.
Бұл өзгерістер қаржы институттарының мүмкіндіктерін кеңейтуге, бәсекеге қабілеттілігін арттыруға және Қазақстанның банк секторының цифрлық трансформациясын жеделдетуге бағытталған.
