Covid-19 коронавирус инфекциясының пандемиясы қалыпты өмір салтымызға өзгерістер енгізуді жалғастыруда. Ережелер мен заңдар өткен жылмен салыстырғанда жиі жаңартылуда. Сәуір бізге қандай өзгерістер әкелгенін (және енді оны қалай қолданатынымызды) қарап шығайық:
- Үкімет шағын және орта бизнесті қолдау шараларының пакетін кеңейтті. Мемлекет басшысының «Экономиканы тұрақтандыру жөніндегі қосымша шаралар туралы» Жарлығы төлемдерді кейінге қалдырудың бірқатар тетіктерін, зардап шеккен салалар үшін салық және жалдау төлемдерінен босатуды көздейді. Жеке кәсіпкерлер жыл соңына дейін табыс салығын төлеуден босатылады, ірі сауда нысандары үшін мүлік салығы алынып тасталды, ауыл шаруашылығы өнімін өндірушілер жер салығын төлемейді. Толық тізбесін Жарлықтан қараңыз.
- Төтенше жағдай кезінде табыс көзінен айырылған Қазақстан азаматтарына 42 500 теңге мөлшерінде екінші төлем тағайындалады. Бұған қайта құжат тапсырудың қажеті жоқ, төлемдер бұрын берілген өтінімдер негізінде есептеледі. 20 сәуірден кейін жұмысқа шығып, табысын қалпына келтіргендерге екінші төлем төленбейді.
- Үкімет салықтық бақылау шараларын уақытша тоқтатты. Барлық салық және кедендік тексерулер тоқтатылды. Карантин басталғанға дейін қозғалған істердің қаралуы да тоқтатыла тұрды. Сондай-ақ төтенше жағдай кезеңінде шоттарды бұғаттауға тыйым салынады. Бұл шаралар ТЖ алынғанға дейін күшінде. Нақты күні әзірге жарияланған жоқ.
- «Бизнестің жол картасы 2025» бизнеске қолдау көрсету бағдарламасы енді экономиканың барлық салаларына қолданылады. Бастапқыда ол белгілі бір топтарға ғана арналды, пандемияға байланысты бағдарлама ауқымы кеңейтілді. Енді кез келген кәсіпкерлік субъектісі қатысуға өтінім беріп, жеңілдетілген қаржыландыру ала алады.
- 22 сәуірде Бірыңғай жиынтық төлемді (БЖТ) төлеуге арналған ыңғайлы әрі қарапайым сервис іске қосылды. Ол Мемлекеттік кірістер комитеті порталының eSalyq мобильді қосымшасында іске асырылған. Мұнда бірден жеке табыс салығын, Мемлекеттік әлеуметтік сақтандыру қорына аударымдарды, БЖЗҚ-ға зейнетақы жарналарын және Міндетті әлеуметтік медициналық сақтандыру қорына аударымдарды төлеуге болады. Қосымшаны App Store және Play Market-тен жүктеп алуға болады.
Жаңалықтарды бақылауды жалғастырамыз және карантиннің толық алынуын күтеміз. Өзіңізді және бизнесіңізді қорғаңыз!
