Қыркүйек аяқталып келеді, тымау мен вирустық инфекциялар маусымы күшіне енді. Бұрын мұндай хабарларға онша мән бермесек, қазір екінші локдаун қаупі төніп тұрғандықтан, алаңдаушылық күшейді. Үкімет жаһандық карантин мен дағдарыстың алдын алу үшін бар шараны қолданып жатқанда, біз де дер кезінде әрекет ету үшін жаңалықтарды жіті бақылап отырмыз. Қыркүйекте болған негізгі жайттар:
- Мемлекеттік сатып алулар 1С-пен интеграцияланады. Енді мемлекеттік сатып алу порталының деректері 1С есеп жүйелерімен синхрондалады. Әзірге пилотқа тек мемлекеттік ұйымдар қатысады, кейін өзге кәсіпорындар да қосылады. Негізгі мақсат – мемлекеттік сатып алумен байланысты бухгалтерлік есепті стандарттау.
- Алматыда Кәсіпкерлерді қолдау орталығы ашылды. ШОБ-ты қолдау – Үкімет үшін басым бағыт, сондықтан кәсіпкерлер мемлекеттен қолдау ала алатын орталықтар ашылып, іске қосылып жатыр. Алғашқы орталық Алматының орталығында ашылды, жақын уақытта осындай тағы бірнеше орталық ашу жоспарланған.
- «Бизнестің жол картасы-2025» бағдарламасының қамту аясы кеңейтіледі. Енді бағдарламаға микро және шағын бизнес субъектілері де қатыса алады. Осылайша бизнестің ең осал бөлігі де өз үлесіндегі қолдауға қол жеткізеді.
- Коронавирус індетінің екінші толқынына қарсы күреске ӘМСҚ 159 млрд теңге бөледі. Оның ішінде коронавирус жұқтырған науқастарды емдеуге – 50,5 млрд теңге, медицина қызметкерлерінің үстемақыларына – 91,9 млрд теңге, стационар деңгейіндегі ПТР-зерттеулерге – 4,2 млрд теңге, үйде стационарлық қызмет көрсетуге – 0,4 млрд теңге, амбулаториялық деңгейдегі ПТР-зерттеулерге – 10 млрд теңге, мобильді бригадалардың жұмысына – 2,4 млрд теңге.
- № 413 Жарлыққа қол қойылды «Қазақстан Республикасы Үкіметінің Қазақстан халқына Мемлекет басшысы 2020 жылғы 1 қыркүйекте жолдаған «Жаңа шынайылықтағы Қазақстан: іс-қимыл уақыты» Жолдауын іске асыру шаралары туралы». Бұл көптеген өзгерістер болатынын білдіреді: олардың қатарында 2020 жылдың соңына дейін еңбекақы қоры бойынша салықтарды алып тастау және тағы басқа шаралар бар.
Көріп отырғаныңыздай, күн тәртібі әлі де коронавирус инфекциясы мен оның салдарымен күрес тақырыбына шоғырланып тұр. Жеңіл болады немесе дағдарыстан толықтай құтыламыз деп ешкім уәде бермейді, бірақ қазіргі жағдайда қолдан келгеннің бәрі жасалып жатыр. Сондықтан бір-бірімізді қорғайық, маска тағып, барлық талаптарды сақтайық – сонда, үміттенеміз, қайталанған оқшауланудан аулақ боламыз.
