2026 жылғы 1 қаңтардан бастап жаңа Салық кодексі күшіне енді. Соның нәтижесінде арнаулы салық режимдерінің саны үшеуге қысқартылды:
- өзін-өзі жұмыспен қамтығандарға арналған режим;
- оңайлатылған декларация негізіндегі режим;
- шаруа (фермер) қожалықтарына арналған режим.
2026 жылы таңдаған салық режимін хабарлама арқылы растау қажет.
Хабарламаны қалай беру
Салық режимін қолдану туралы хабарламаны бірнеше тәсілмен беруге болады:
- Салық төлеушінің кабинеті (ИС ИСНА) арқылы;
- E-Salyq Business мобильді қосымшасында;
- тіркелген жері бойынша Мемлекеттік кірістер басқармасында — қағаз түрде;
- банктердің қосымшалары арқылы.
Қазіргі уақытта мұндай сервис, атап айтқанда, Kaspi Bank қосымшасының «Мемқызметтер» бөлімінде іске асырылған.
Хабарлама қате берілсе
Мемлекеттік кірістер комитеті 2025 жылдың соңында «ауысу» себебі көрсетіліп берілген хабарламаларға қатысты жағдайға назар аудартты. 2026 жылғы 12 қаңтардан бастап ақпараттық жүйеде дұрыс себебі бар хабарламаны қайта жіберу мүмкіндігі пайда болды. Қате жіберген салық төлеушілер жаңа хабарлама жіберуі қажет.
Өзін-өзі жұмыспен қамтығандар режиміне ауысу
2026 жылғы 1 наурыздан бастап салық органдары 2025 жылы мына режимдерді қолданған салық төлеушілерді жеке кәсіпкер (ЖК) ретінде автоматты түрде есептен шығарады:
- патент негізіндегі арнаулы салық режимі;
- арнайы мобильді қосымшаны қолданатын режим.
Бұл ретте есептен шығару күні 2026 жылғы 1 қаңтар деп есептеледі.
Егер салық төлеуші алдын ала өзге салық режимін қолданатыны туралы хабарлама берсе, автоматты түрде есептен шығарылмайды. Өзін-өзі жұмыспен қамтығандар үшін режимді қолданудың басталу күні E-Salyq Business қосымшасында алғашқы чекті қалыптастырған күн болып есептеледі.
Шаруа (фермер) қожалықтарына арналған режим
Шаруа (фермер) қожалықтарына арналған арнаулы салық режиміне көшу 2026 жылғы 1 наурызға дейін автоматты түрде жүзеге асырылады. Бұл жағдайда хабарлама беру талап етілмейді.
2026 жыл — өтпелі жыл, бірақ жауапкершілік сақталады
Мемлекеттік кірістер комитеті атап өтеді: 2026 жыл өтпелі жыл болып жарияланды. Алайда салық режимін таңдау міндеті толықтай салық төлеушінің өзіне жүктеледі.
Егер мерзім өткізіліп алынса, жыл басынан қайта есептеліп, жалпыға бірдей белгіленген салық салу тәртібін қолдану салдарынан салық жүктемесі артып, қосымша міндеттемелер туындауы мүмкін.
